دبئی۔6مارچ (پی این):متحدہ عرب امارات کے محمد بن راشد سولر پارک کے ساتویں مرحلے کی ترقی کے لیے بین الاقوامی ڈویلپرز کو دعوت دیدی گئی ہے۔امارات نیوز ایجنسی وام کے مطابق د بئی الیکٹریسٹی اینڈ واٹر اتھارٹی (دیوا) نے بین الاقوامی ترقیاتی اداروں کو محمد بن راشد آل مکتوم سولر پارک کے 1,600 میگاواٹ کے ساتویں مرحلے کی ترقی کے لیے دلچسپی کے اظہار (ای او آئی ) کی دعوت دے دی۔
یہ مرحلہ 2,000 میگاواٹ تک توسیع پذیر ہوگا اور فوٹو وولٹک سولر پینلز کے ساتھ ایک جدید بیٹری انرجی سٹوریج سسٹم پر مشتمل ہوگا، جو 1,000 میگاواٹ کی توانائی چھ گھنٹوں کے لیے ذخیرہ کر سکے گا، جس سے کل ذخیرہ کرنے کی صلاحیت 6,000 میگاواٹ آور تک پہنچ جائے گی۔یہ منصوبہ دنیا کے سب سے بڑے سولر پلس سٹوریج منصوبوں میں شمار ہوگا اور اسے آزاد بجلی پیدا کرنے والے ماڈل کے تحت نافذ کیا جائے گا۔
دیوا نے عالمی ڈویلپرز اور کنسورشیا کو 21 مارچ 2025 تک اپنی دلچسپی ظاہر (ای او آئی ) کرنے کی دعوت دی ہے۔ساتواں مرحلہ سالانہ 4.5 ٹیراواٹ آور بجلی پیدا کرے گا، جس سے 36 ارب مکعب فٹ سے زائد قدرتی گیس کے جلنے سے بچا جا سکے گا۔ اس توسیع کے ساتھ سولر پارک کی منصوبہ بندی شدہ پیداواری صلاحیت 5,000 میگاواٹ سے بڑھ کر 7,260 میگاواٹ ہو جائے گی، جس سے دبئی کی توانائی میں صاف توانائی کا حصہ 27 فیصد سے بڑھ کر 34 فیصد تک پہنچ جائے گا۔
اس مرحلے کی تکمیل سے کاربن ڈائی آکسائیڈ کے اخراج میں سالانہ 6.5 ملین ٹن سے بڑھ کر تقریباً 8 ملین ٹن کمی واقع ہوگی، جو دبئی کو عالمی سطح پر پائیداری اور قابل تجدید توانائی میں جدت طرازی کا مرکز بنانے کے حکومتی عزم کو مزید تقویت دے گا۔یہ مرحلہ 2027 سے 2029 کے درمیان مختلف مراحل میں آپریشنل ہوگا، جو دبئی کی توانائی کی ضروریات کو پائیدار ذرائع سے پورا کرنے میں ایک انقلابی قدم ہوگا۔
